في صدمة من العيار االثقيل، نشرت الكاتبة الصحفية هند الضاوي على صفحتها في “فيسبوك” قصة شقيق والدتها مع أباطرة الفساد في محافظة القاهرة، في تعريضهم مصالح أبناء منطقة الروبيكي، لمن يدفع أكثر.
قالت “الضاوي” : ” بما إني صحفية وطبيعة عملي أصلا تتمثل في توصيل صوت الناس إلى المسئولين.. تعرضت لموقف غريب جدًا منذ عدة أيام وضعني في صدمة حقيقة من المسئولين قبل الفاسدين.. الواقعة تتمثل في إن جدي والد مامتي لديه مدابغ جلود في منطقة عين الصيرة، وتوفى جدي منذ أكثر من ٢٥ عام وأصبحت أمي وأشقاءها هم الورثة.. بعد إعلان الدولة عن نقل المنشآت إلى منطقة الروبيكي لتحويل المنطقة من صناعية إلى سياحية … كان هناك إجراءات مع اللجنة المشكلة من قبل مجلس الوزراء، واتخذت من المحافظة مقرًا.. وتابع خالي الإجراءات يوميًا حتى وصلنا لمرحلة تخصيص المنشأة الجديدة.. وقتها ابلغنا هشام عمر أحد أعضاء اللجنة -سمعته سبقاه- أن مفيش داعي نروح كل يوم وهو أو محمد حربي رئيس الغرفة التجارية-سمعته أعظم من هشام بمراحل- سيقومون بإخطارنا حال تخصيص البناية. مطولش عليكم لما محدش عبرنا رغم إن هشام اتصل بخالي” لطلب مساعدة منه- الخلاصة قلقنا وروحنا نسأل قالوا جواب التخصيص طلع بس مش لاقينه-اه وربنا قالوا كدا- المهم فضلنا ندور شمال ويمين وضغطنا على هشام قالنا أنتوا مجتوش فخذها حد تاني… من غير اخطار بجواب أو رنة حتى واحنا نتصل.. على أساس أننا نسينا القهوة فحد شربها عشان ما تبردش… المهم ربنا كرمنا بحد يجيب لنا كشف التخصيص فطلع احنا رقم واحد بحكم أن جدي كان من الأباء المؤسسين في المنطقة القديمة”
وأشارت “الضاوي” إلى أن : ” الكلام كتير وناس قالت إنك لو كنت دفعت إكرامية كدا كنت هتستلم حتى لو مش دورك وده حصل معانا اهووو رقم واحد مستلمش.. اتصلت بمحمد حرب واتهرب مني لأنه لم يخطرنا بالتواطئ مع هشام وياسر المغربي عمدًا عشان يدوا وحدتنا لواحد احترم سيستم الفساد بتاعهم … عملت أنا وخالي زي ما كل دول العالم بتعمل .. كلمت المحافظ وبعتله شكوى رسمية وشافها ومردش-طبعا في ناس بتقول أن الحي بيقسم والله أعلم مش بحب اطلع اشاعات بس ده كلام ناس، بعتنا شكوى للرقابة الإدارية وحتى الان لم نتلق رد” .
ملاحظة بقى هي الجهات الرقابية إزاي مش عارفة فساد الروبيكي الي وصل لفوق الركب!!.. ومين بيحمي محمد حربي وهشام وامثالهم!!
وإزاي الناس ديه بتسرق حقوقنا عيني عينك كدا والمسؤولين بتوصل لهم الشكاوي وبيعملوا من بلد تانية!!
الدولة بتعمل مشاريع حلوووه جدًا وشغل ممتاز بس للاسف قبل ما بتوصل للشعب بتكون اتنهبت من طبقة سميكة فاسدة لابد من إزالتها أولاً!!
من جهته علق الكاتب الصحفي ناجي عباس على ما نشرته “الضاوي” فقال : ” لما سالت في المحافظة واحد من الحبايب قال لي يا ناجي بك فيما يتعلق بالروبيكي ولا المحافظ نفسه يقدر يعمل حاجة..التسعيرة معروفة.. تفضل في الكشف رغم انه حقك وما تتسوحش مئة الف جنيه.. تاخد رقم متقدم في الكشف غير رقمك ربع مليون جنيه.. ..تاخد تخصيص وانت مالكش حق من اصله نص مليون جنيه، والتسعيرة دي ولا المحافظ نفسه يقدر يهزها.وعايز حقك روح دور عليه.. “